معلومات مفيدة في شغل الكروشيه مع فستوكه

بسم الله الرحمن الرحيم
_________________
فستوكاتى الحلوين فستوكه كالعاده جيبالكم موضوع معدى

وهو معلومات مفيدة في شغل الكروشيه

طيب قولنا يافستوكه ايه هى المعلومات المفيده
تعالوا معايا يلا نشوف موضوعنا بيتكلم عن ايه
____________________

_ تغيير مقاس الابره او سناره الكروشيه (لنفس سمك الخيط)

___________________
ما الذى يحدث عندما يتغير مقاس( الابره او سناره او الهوكى) بتاع الكروشيه
١-تقل كمية الخيط المستهلكة
٢-يقل الوقت والمجهود المستهلك
٣- تزداد الفراغات بين الغرز
٤- زادت مرونه القطعة المنسوجة
(والعكس صحيح)عندما تقل فى المقاس
مثال للتوضيح
"عملتى شنطه من خيط المكرميه بإبرة ٥  واحتاجت كيلو خيط و٢٠ ساعة شغل وكان قوامها ناشف ومتماسك ومفيش فراغات بين الغرز
لو عملتى نفس الشنطة بنفس مقاسها بإبرة ٦ ممكن تحتاجى كيلو إلا ربع خيط و١٥ ساعه شغل وقومها هيبقى طرى عن الأول وهيكون فيه فراغات بين الغرز"
___________________________

طريقه تحدد مقاس الإبرة المناسب للخيط

رقم الإبرة بيختلف باختلاف
١-سمك الخيط
٢-نوع الغرزة اللى هستخدمها
٣- الموديل نفسه
 ( يعنى رقم الإبرة المستخدمة لكوفية هيكون مختلف عن رقم الإبرة المستخدمة لبلوفر  لنفس سمك الخيط)
٤- الأشخاص
( بمعنى لو جبت بنتين و اديتهم نفس الخيط ونفس رقم الابره عشان يعملوا مفرش مثلا والنتيجه كانت ان المفرشين مش بنفس الحجم، وده بسبب ان مش كلنا ايدينا زي بعض في بنات بتشد ايدها قوي وهي بتشتغل وناس بترخي ايدها قوي وناس بتشدها حبه صغيره وهكذا).
-----------------------------
الطريقه الصح عشان تحددي مقاس الابره المناسب انك تجربي في قطعه صغيره
مثال
هتجيبى الخيط اللي هتستخدميه واختاري اي رقم ابره معقول
 (معقول يعني ما تكونيش ماسكه خيط قطن وتقولي هاجرب ابره رقم 12 🙄😅او تكوني ماسكه خيط كليم وتقولي هاجرب ابره رقم اثنين)
تعملي 10 سلاسل مثلا وتبداى تشتغلى عليهم سطرين بنفس الغرزه اللي هتستخدميها في الموديل ،
هتلاحظى حاجه من اثنين.
----------------------
أولا :الغرز مضبوطه وما فيش اي فراغات بينها ،هتجيبي ابره اكبر بنصف درجه وتعملي كمان سطرين، لو لقيت الغرز لسه مضبوطه وما فيش اي فراغات بينها هتجيبي ابره اكبر بنصف درجه كمان وتعملي كمان سطرين ،و تكرري الموضوع لحد ما توصلي للابره اللي هتعمل فراغات بين الغرز
( يبقى الابره اللي عملت فراغات بين الغرز دي مش هاستخدمها واستخدم الابره اللي قبلها على طول بنصف درجه).
_________________

ثانيا: يوجد فراغات واسعه جدا بين الغرز، يبقى هتحتاجي تصغري رقم الابره وتجربي وتعملي كمان سطرين من غير ما تفكى السطرين اللي قبلهم ،لو لسه في فراغات واسعه جدا هتصغرى رقم الابره تاني نصف درجه وتجربي وهكذا.
ماعدا بعض الموديلات بيكون الفرغات فيها كويسة
__________________

 وعموما انت هيكون معاكى قطعه فيها سطرين من كل رقم ابره وبخيط مختلف خليها مرجع ليكى علشان تقدري تختاري منها شكل الغرزه المناسب للموديل اللي هتشتغليه وبالتالي رقم الابره.
______________________

طريقه معرفه مقاس سناره او ابره الكروشيه والخيط المناسب لها من خيوط الصوف

__________________
ارجوا ان اكون افادتكم
انتظرونى بموضوع جديد وشيق
فستوكه